बाजुरा । बागमती प्रदेश सरकारका मुख्यमन्त्री इन्द्रबहादुर बानियाँका कारण बाजुरालाई मुगु हुँदै हुम्ला जोड्ने सडक कालोपत्रे अलपत्र परेको छ ।
मुख्यमन्त्री बानियाँको ‘बानियाँ निर्माण सेवा’ले ठेक्का लिएका बाजुराका तीनवटा सडक अलपत्र पर्दा उनले कालोपत्रेको जिम्मा लिएको एउटा सडकको १३ करोड रुपैयाँ काम नभएपछि फ्रिज भएको छ ।
तीन आयोजना अलपत्र, बिनाउपलब्धि ८० लाख खर्च
भौतिक पुर्वाधार मन्त्रालयको वेबसाइटका अनुसार बानियाँको यो कम्पनी ‘क’ वर्गको हो । इजाजत नम्बर ३४९० रहेको यस कम्पनीका सञ्चालक माडी–४ मकवानपुरका इन्द्रबहादुर बानियाँ उल्लेख छ । निर्माण कम्पनीको वेबसाइट बानियाँ कन्ट्रक्सन डटकममा पनि सञ्चालकका रूपमा बानियाँ नै छन् ।
यस कम्पनीले कालोपत्रेको जिम्मा लिएको बाजुराको सदरमुकाम मार्तडीदेखि पूर्वी उत्तर क्षेत्रका चारवटा स्थानीय तह, मुगु र हुम्ला जोड्ने २६ किलोमिटर सडक कालोपत्रे गर्ने काम ४ वर्षदेखि अलपत्र छ ।
बाजुरा सदरमुकाम मार्तडीबाट कोल्टी हुँदै मुगु र हुम्ला छुने यो सडक कालोपत्रे गर्न भनेर कम्पनीले हालसम्म ८० लाख रुपैयाँ भुक्तानीसमेत लिइसकेको छ । तर, सडक कालोपत्रे गर्ने काम भने शून्य छ ।
पूर्वाधार कार्यालय बाजुराका प्रमुख जंग थापाका अनुसार पटकपटक म्याद थप गर्दा पनि सडक कालोपत्रे हुन सकेको छैन । बानियाँकै निर्माण कम्पनीले ठेक्का लिएको अछामको मुजाबगरबाट रामारोशनसम्मको १७ दशमलव ६७ किलोमिटर सडक कालोपत्रे कार्य पनि अलपत्र छ । १७ किलोमिटर सडक कालोपत्रे गर्न भन्दै २६ करोड रुपैयाँ लिएको भए पनि काम भने भएको छैन ।
बाजुराबाट मुगु हुँदै हुम्ला जोड्ने यो सडक कालोपत्रेका लागि आर्थिक वर्ष २०७६–७७ मा सम्झौता भए पनि हालसम्म निर्माण सम्पन्न भएको छैन । पूर्वाधार विकास कार्यालय अछामका प्रमुख थापाका अनुसार आव २०७६–७७ मा चुथिबाट कोल्टीसम्मको २६ किलोमिटर सडक कालोपत्रे गर्नेगरी निर्माण कम्पनीसँग ५० करोड १७ लाखमा ठेक्का सम्झौता भएको थियो ।
यस कम्पनीसँग मुजाबगर–रामारोशन जोड्ने सडक कालोपत्रेका लागि सोही वर्ष ५७ करोड ४२ लाख ८३ हजार २ सय ३९ मा रुपैयाँमा सम्झौता भएको थियो । दुवै ठेक्का २०७७ असारमा भएको सम्झौताअनुसार ३ वर्षभित्र काम सम्पन्न गर्नुपर्ने थियो । तर, थापाका अनुसार दुवै आयोजना अलपत्र छन् ।
‘बानियाँ निर्माण सेवाले आव २०७८–०७९, २०८०–०८१ र २०८१–८२ मा तीनपटक म्याद थप गर्दा पनि काम सम्पन्न गर्न सकेको छैन, जसका कारण अछाम र बाजुराका जनतालाई सदरमुकाम आउजाउ गर्न र बिरामी हुँदा उपचार गर्नसमेत समस्या भएको छ,’ थापाले राजधानीसँग भने ।
बहादुरसिंह लामाले राजीनामा दिएसँगै बानियाँ बागमती प्रदेशको मुख्यमन्त्री बनेका छन् । ‘क’ वर्गका निर्माण व्यवसायी बानियाँको कम्पनी बानियाँ निर्माण सेवाले ठेक्का लिएका सडक अलपत्र छन् । सडक नबन्दा स्थानीयले चरम सास्ती भोगिरहेका छन् ।
प्रदेश सरकारको बहुवर्षीय योजनाअन्तर्गत रहेको मार्तडी–कोल्टी सडकखण्ड निर्माणमा ठेकेदार कम्पनीको चरम लापरबाहीका कारण बजेट नै फ्रिज हुने अवस्था छ । निर्माणको जिम्मा पाएको बानियाँ निर्माण सेवा जेभीले काम नगर्दा १३ करोड रुपैयाँ त फ्रिज नै भइसकेको छ ।
कार्यालयले एकपटक म्याद थप गरे पनि चालू आवमा विनियोजित बजेट हुँदाहुँदै पनि ठेकेदारले काम नगरेको पूर्वाधार विकास कार्यालयका प्रमुख थापाले बताए । ठेकेदारले समयमै काम नगर्दा जेठ दोस्रो साता सडकसमेत सञ्चालनमा छैन ।
हरेक वर्ष सास्ती
सुदूरपश्चिमको पहाडी जिल्ला बाजुरा, कर्णालीको हुम्ला र मुगु जिल्ला जोड्ने मार्तडी–कोल्टी सडक २६ जेठदेखि वर्षात्का कारण बिग्रेपछि सञ्चालन हुन सकेको छैन । हालसम्म सडक सफा नगर्दा स्थानीयलाई समस्या परेको हो ।
जिल्लाका अन्य आन्तरिक सडकसमेत खोल्ने सुरसार छैन । मैरेदेखि छतारा सडक, मैरेदेखि कैलाशमाण्डौ, मार्तडी–घटमना सडक बन्द छन् ।
‘सडकमा भएका खोलामा पुल नहुँदा सवारीसाधन वारपार गर्न सकेका छैनन्, सामग्री ढुवानीमा समेत सकस छ,’ उद्योग वाणिज्य संघ बाजुराका अध्यक्ष देबहादुर रोकायाले भने ।
यस वर्ष उत्पादन भएको स्याउ ढुवानीका लागिसमेत समस्या भएको छ । जिल्ला सदरमुकामसम्म पुग्ने सडक मर्मम नहुँदा गाउँमा उत्पादन भएको स्याउ ढुवानीका लागि कार्णालीको बाटो प्रयोग गरी महँगो भाडा तिर्नुपरेको स्वामीकार्तिक–१ साप्पाटाका मनबहादुर रोकायाले बताए ।
मार्तडीदेखि चुथीसम्मको ९ किलोमिटर सडकको निर्माणको जिम्मा धुलिखेल ग्याल्भा स्यामशंकर जेभीले, चुथीदेखि ढम्कनेसम्म ५ किलोमिटरको निर्माणको जिम्मा बानियाँ बिल्डरले र ढम्कनेदेखि माथिको २६ किलो मिटर सडक निर्माणको जिम्मा बानियाँ निर्माण सेवाले लिएका छन् ।
