भक्तपुर
भक्तपुर क्षेत्र नं. २ बाट प्रतिनिधिसभा सदस्य दुर्लभ थापा स्वास्थ्य उपचारपछि आइतवार भारतको दिल्लीबाट स्वदेश फर्किनुभएको छ। उहाँ अपोलो स्पेक्ट्रा अस्पताल, दिल्लीमा उपचार गराएर नेपाल फर्किनुभएको हो।
लामो समयदेखि बायाँ हिपसम्बन्धी समस्या झेल्दै आउनुभएका सांसद थापाको अपोलो अस्पतालमा डा. सुनिल टुलीको नेतृत्वमा हिप रिप्लेस्मेन्ट सर्जरी गरिएको थियो। यसअघि, गत वर्ष उहाँको दायाँ हिप रिप्लेस्मेन्ट गरिएको थियो।
सांसद थापालाई चिकित्सकले केही समय पूर्ण विश्राम गर्न सल्लाह दिएकाले हाललाई औपचारिक सार्वजनिक कार्यक्रमहरूमा सहभागी नहुन सुझाव दिएको उहाँका स्वकीय सचिव शुभाषिस ढकालले जानकारी दिनुभयो।
उहाँलाई त्रिभुवन अन्तर्राष्ट्रिय विमानस्थलमा स्वागत गर्न नेपाली कांग्रेस भक्तपुरका सचिव सुशिल बस्नेत, सहसचिव यादव प्रसाद अधिकारी, मध्यपुर थिमि नगरपालिकाका प्रमुख सुरेन्द्र श्रेष्ठ, चाँगुनारायण नगरपालिकाका प्रमुख तथा कांग्रेस क्षेत्र नं. १ का सभापति जीवन खत्री, मध्यपुर थिमि नगर सभापति हरीदास प्रजापति लगायत नेता तथा कार्यकर्ता सहभागी भएका थिए।
