काठमाडौं । नेपाली राजनीतिमा मेलमिलापका प्रणेताका रूपमा चिनिने प्रथम जननिर्वाचित प्रधानमन्त्री बिपी कोइरालाको स्मृति दिवसकै अवसरमा नेपाली कांग्रेसभित्रको आन्तरिक विवाद थप सतहमा आएको छ। लामो समयदेखि जारी अन्तरसंघर्षबीच संस्थापनइतर समूहले साउन २९ गते राष्ट्रिय भेला आह्वान गर्दै त्यसअघिसम्म सहमतिको प्रयास सफल नभए पार्टी विभाजन हुन सक्ने चेतावनी दिएको छ।
काठमाडौंस्थित नेपाल प्रज्ञा–प्रतिष्ठानमा ‘संवाद, सहमति र एकता आजको आवश्यकता’ भन्ने नारासहित आयोजित कार्यक्रममा अधिकांश वक्ताहरूले कांग्रेस सभापति गगन थापाको नेतृत्वप्रति असन्तुष्टि व्यक्त गर्दै पार्टीको वर्तमान दिशामाथि प्रश्न उठाए। कार्यक्रमको केन्द्रबिन्दु नै गगन थापाविरुद्धको आलोचना र नेतृत्व परिवर्तनको माग बनेको देखियो।
गगनविरुद्ध एकै ठाउँमा उभिए असन्तुष्ट नेता
कांग्रेसको आन्तरिक राजनीतिमा फरक–फरक धारमा रहेका वरिष्ठ नेताहरू प्रकाशमान सिंह, विमलेन्द्र निधि, डा. शेखर कोइराला, डा. शशाङ्क कोइराला, पूर्णबहादुर खड्का र कृष्ण सिटौला एउटै मञ्चमा देखिए। विगतका महाधिवेशनमा एकअर्काका प्रतिस्पर्धी रहेका यी नेताहरूले अहिले पार्टी एकताको नाममा सहकार्य आवश्यक भएको धारणा राखे।
कार्यक्रमका संयोजक प्रकाशमान सिंहले कांग्रेसको इतिहास नै दुई धारको सहकार्यबाट सुरु भएको स्मरण गराउँदै अहिले पनि दुवै पक्ष मिलेर महाधिवेशन हुनुपर्ने बताए। सहमति नभए आफूहरू निष्क्रिय नबस्ने चेतावनी पनि उनले दिए।
बिपीको नाममा गगनमाथि तीखा प्रहार
बिपी कोइरालाको स्मृतिमा आयोजना गरिएको कार्यक्रम भए पनि अधिकांश वक्ताको निशाना सभापति गगन थापा बने। पूर्वमन्त्री मोहन बस्नेत, पूर्व केन्द्रीय सदस्य कुन्दनराज काफ्ले, सुदूरपश्चिम कांग्रेस सभापति वीरबहादुर बलायरलगायतले गगन थापाको नेतृत्व शैलीको खुलेर आलोचना गरे।
बस्नेतले गगन थापालाई कांग्रेस कमजोर बनाउने नेतृत्वको संज्ञा दिँदै नयाँ राजनीतिक विकल्प निर्माणको संकेत गरे। काफ्लेले वर्तमान नेतृत्वमा बिपीको विचार र आदर्श नरहेको आरोप लगाए भने बलायरले क्रियाशील सदस्यता नवीकरणका नाममा कार्यकर्तामाथि अन्याय भइरहेको दाबी गरे।
पूर्व सहमहामन्त्री डा. प्रकाशशरण महतले गगन थापा र काठमाडौं महानगरका प्रमुख बालेन्द्र शाहको शैली तुलना गर्दै दुवैले एक्लै संस्था चलाउन खोजेको टिप्पणी गरे। पूर्व महामन्त्री डा. शशाङ्क कोइरालाले कांग्रेसको एकता जोगिन नसके त्यसको नैतिक जिम्मेवारी सभापति गगन थापाले लिनुपर्ने बताए।
साउन २९ लाई निर्णायक मिति
संस्थापनइतर समूहले साउन २९ गते राष्ट्रिय भेला बोलाएको छ। नेताहरूका अनुसार त्यसअघिसम्म पार्टीभित्र सहमतिको वातावरण नबने नयाँ राजनीतिक निर्णय लिन सकिने संकेत गरिएको छ। यसले कांग्रेसभित्रको शक्ति संघर्ष अब निर्णायक मोडमा पुगेको देखिएको छ।
संस्थापन पक्षको जवाफ आउने तयारी
यता कांग्रेस संस्थापन पक्षले पनि बिपी स्मृति दिवसकै अवसरमा राष्ट्रिय सभागृहमा कार्यक्रम आयोजना गर्ने तयारी गरेको छ। सभापति गगन थापाले समसामयिक राजनीतिक विषयमा आफ्नो धारणा सार्वजनिक गर्ने बताइसकेकाले संस्थापनइतर समूहका आरोप र राष्ट्रिय भेलाबारेको जवाफ सोही कार्यक्रममार्फत आउने अपेक्षा गरिएको छ।
कांग्रेसभित्र बढ्दो ध्रुवीकरण र साउन २९ को राष्ट्रिय भेलाले पार्टीको आगामी राजनीतिक दिशा र एकताको भविष्य निर्धारण गर्ने महत्वपूर्ण मोड बन्ने संकेत देखिएको छ।
