काठमाडौँ । राष्ट्रिय स्वतन्त्र पार्टी (रास्वपा) ले मंगलबार बालुवाटारमा प्रदर्शन गर्ने भएको छ । रास्वपाले सहकारी ठगी, संगठित अपराध र सम्पत्ति शुद्धीकरणमा पक्राउ परेका आफ्ना सभापति रवि लामिछाने राजनीतिक प्रतिशोधका आधारमा पक्राउ परेको भन्दै तत्काल रिहाइको माग गर्दै प्रदर्शन गरिरहेको छ
रास्पवाले अधिनायकवादी दुई तिहाई सरकारको राजनीतिक प्रतिशोध र दम्भको स्रोत खोज्न भन्दै बालुवाटारमा नेपाल हाउसको अगाडि १२ बजेदेखि प्रदर्शन गर्ने जनाएको छ ।
यसअघि पोखरा केन्द्रित प्रदर्शन गरेको रास्वपाले अहिले काठमाडौँ केन्द्रित आन्दोलन गर्ने भने पनि सशक्त आन्दोलन गर्न अलमल गरेको छ ।
लामिछानेको पक्षमा प्रदर्शन गरिरहेको रास्वपाले आम रुपमा जनताको समर्थन पाउन नसकेपछि आन्दोलनको स्वरूप परिवर्तन गरेको देखिएको छ ।
रास्वपा कार्तिक २ गते पक्राउ परेका आफ्ना सभापतिलाई अदालतले न्याय दिनेमा सशंकित छ । किनकि रास्वपालाई पनि राम्रोसँग थाहा छ कि सहकारी ठगीमा रविका जस्ता सयौँ आरोपी जेलमा छन् ।
एक दुई लाख खाने त जेलमा छन् भने रवि त करोडौँ हिनामिनाको आरोपमा पक्राउ परेका छन् । सँगसँगै उनको मुद्धा संगठित अपराध र सम्पत्ति शुद्धीकरणको पनि छ ।
अहिले उनी पोखराको सूर्यदर्शन सहकारीमा परेको रिटका आधारमा उनी पक्राउ परेका हुन् । संसदीय छानबिन समितिले उनलाई दोषी देखाएपछि त्यो आधार पनि प्रमुख रहेको छ ।
उता बुटवलको सहकारीमा पनि उजुरी परेपछि रुपन्देही जिल्ला प्रहरीलेसमेत पक्राउ पुर्जी जारी गरेको छ ।
अन्य तीन सहकारीबाटसमेत रकम ठगी भएको प्रतिवेदन छानबिन समितिले दिइसकेकाले बाँकी रहेका तीन सहकारी रहेका जिल्लाबाटसमेत उनलाई पक्राउ पुर्जी जारी हुने सम्भावना छ ।
रविको चरित्र ठीक भैदिएको भए रास्वपाले जतिसक्यो छिटो फैसलाका लागि अदालतसँग अनुनय विनय गर्न सक्दथ्यो । तर त्यसो गरिएन । किनकि रवि दोषी छन् भनेर उनकै पार्टीका सदस्यसमेत रहेको प्रतिवेदनले बोलिसकेको छ ।
रविले गोर्खा मिडिया प्रालिमा हुँदा गरेको त्यो दुरुपयोगलाई सघाउन पीडितको पैसा फिर्ता गर्न म आफैँ लाग्छु पनि भनेनन् । उनले प्रतिवेदन आउना साथ त्यो स्वघोषणा गरेर प्रक्रिया अगाडि बढाएको भए त्यहाँ कुनै प्रतिशोधको गुन्जायस नै हुने थिएन ।
तर समितिले दोषी देखाउँदा पनि क्लिन चिट पाएँ भनेर उफ्रिने अनि इमानदार कार्यकर्तालाई भड्काउने गर्दा माहोल बिग्रिएको हो ।
अब रवि उम्किने आधार कहीँ कतै देखिँदैन । त्यसैले रास्वपाका नेताहरुसमेत जनताको समर्थन पाउन नसकिरहेका बेलामा अल्मलिएका छन् ।
रवि कुनै तानाशाहलाई ढाल्नका लागि लड्दा लड्दै पक्राउ परेका भए जनताको समर्थन हुन सक्दथ्यो । साथै कुनै ठूलो भ्रष्टाचारको फाइल खोल्दाखोल्दे पक्राउ परेका भए पनि उनीमाथि जनता नरम हुन सक्थे होला ।
तर उनी आफैँ गृहमन्त्री भएका बेलामा ठूला ठूला फाइल तलमाथि पारेका छन् । सुनका डल्ला ल्याउन सघाउने कृष्णबहादुर महरालाई छुट दिएका छन् । कतिपय मुद्दा त उनले चलाउन नै रोके ।
प्रहरी प्रशासनमा हस्तक्षेप गरेर चेन अफ कमाण्डलाई तहसनहस पारे । अनि तिनै रविलाई साथ दिन जनता सडकमा आउँछन् भनेर पत्याउने कसले ?
किन पछि हटे जनता ?
लाखौँ जनता सहकारी पीडित छन् । अनि त्यही मुख्य विषयलाई आधारित मानेर रविलाई पक्राउ गरिएको छ भने फेरि उनलाई उन्मुक्ति दिएर आफ्नो खुट्टामा बञ्चरो हान्नका लागि किन नै पो जनता सडकमा जालान् र । फेरि पहिले पहिलेजस्तो जसले जे भने पनि पत्याइदिनु पर्ने अवस्था अहिले छैन ।
सामाजिक सञ्जालमा उनका कार्यकर्ताका झूटा विवरण जसरी आउँछन् त्यसैगरी कर्तूत पनि सँगसँगै बाहिरिन्छ भन्ने रास्वपाले बिर्सनु भएन ।
अन्य कुनै मुद्दामा पक्राउ परेका भए रविको समर्थनमा जनता सडकमा उत्रने थिए होलान् । तर यहाँ त उनीहरु आफैँ पीडित भएको विषय पर्यो ।
एक दुई जना सहकारी पीडितलाई ल्याएर बोल्न लगाएर रास्वपाले जुनसुकै मिडियाबाजी गर्न खोजे पनि अब पत्याउने आधार रहेन ।
सरकारले जोसुकै आरोपीलाई पक्रन हैसियत राखोस्
यहाँ रवि अपराधी भए अब अदालतले सजाय दिन्छ । उनका बारेमा धेरै बोलिरहनै परेन । खासमा अदालतमा गैसकेको विषयमा बोल्नु पनि हुँदैन, लेख्नु पनि हुँदैन ।
तर रविकै वकिलले अदालतभित्र हुँदै नभएको घटनालाई भएकोजस्तो गरेर बाहिर बोलेको भन्दै जिल्ला प्रहरी कार्यालय कास्कीलेसमेत आक्रोश पोखिसकेको छ ।
सबैले कानूनी दायराभित्र बस्नैपर्छ । अब सरकारले पनि सत्ताधारी दलका कुनै नेता जोडिएका छन् भने उनीहरुलाईसमेत सहकारी मुद्दामा बचाउन खोज्नु हुँदैन ।
एमालेका वरिष्ठ उपाध्यक्ष ईश्वर पोखरेलले यसमा स्पष्ट पारिसकेका छन् । आफ्ना नेताहरु सहकारी प्रकरणमा मुछिए कारबाही हुनुपर्ने बताएका छन् ।
त्यस्तै कांग्रेसका महामन्त्रीद्धय गगनकुमार थापा र विश्वप्रकाश शर्माले पनि कारबाही हुनुपर्नेमा जोड दिएका छन् ।
त्यो हो भने अब सरकार किन रोकिने ? यदि रोकिने हो भने यसले साँच्चिकै नेपाली राजनीतिमा प्रतिशोधको भावना आउँछ ।
कांग्रेस र एमाले मिलेर माओवादी र रास्वपाका नेताहरुलाई कारबाही गर्न खोज्ने अनि माओवादी र रास्वपा मिलेर कांग्रेस र एमालेलाई कारबाही गर्न खोज्ने ।
यसले त मुलुकमा विचलन बाहेक केही ल्याउँदैन । भ्रष्टाचारी होस् वा अपराधी उसको कुनै दल हुँदैन । ऊ भ्रष्टाचारी नै हो । ऊ अपराधी नै हो । हाम्राकुराको सहयोगमा
