काठमाडौं । नेपाल बार एसोसिएसनको २७औँ केन्द्रीय कार्यसमिति निर्वाचनका लागि आज शनिबार बिहानदेखि मतदान सुरु भएको छ। रामशाहपथस्थित सर्वोच्च अदालत परिसर र नेपाल बार एसोसिएसनको कार्यालय परिसरमा रहेका ३६ वटा मतदान केन्द्रहरूमा मतदान प्रक्रिया सुचारु भएको छ।
कानुन व्यवसायीहरू भोट हाल्न लाइनमा लागिरहेका बेला उम्मेदवारहरू भने सर्वोच्च परिसरमै समर्थन जुटाउनका लागि भोट माग्न व्यस्त छन्।
निर्वाचनमा सर्वोच्च, उच्च, विशेष र जिल्ला बार एसोसिएसनका अधिवक्ताहरू तथा कानुन व्यवसायी ९ हजार ९९७ जना मतदाता रहेका छन्।
बार एसोसिएसनले मतदानका लागि मतदाताहरूलाई कानुन व्यवसायी परिषद्बाट जारी गरिएको परिचयपत्र, कानुन व्यवसायी प्रमाणपत्र वा नागरिकताको सक्कल प्रमाणपत्रमध्ये एक अनिवार्यरूपमा ल्याउन आग्रह गरेको छ।
गठबन्धन र प्यानलको प्रतिस्पर्धा
यस पटकको निर्वाचनमा सत्तारूढ गठबन्धनले “लोकतान्त्रिक प्रगतिशील तथा देशभक्त कानुन व्यवसायी समूह” नाम दिएर डेमोक्रेटिक लयर्स एसोसिएसन (DLA), पीपुल्स लयर्स एसोसिएसन (PPLA) र राप्रपा निकट कानुन व्यवसायीहरूको गठबन्धन बनाएको छ।
- अध्यक्ष पदका उम्मेदवार: प्रा.डा. विजयप्रसाद मिश्र (DLA)
- महासचिव पदका उम्मेदवार: केदार कोइराला (PPLA)
त्यसैगरी, प्रतिपक्षी गठबन्धनले गणतान्त्रिक कानुन व्यवसायी संगठन (RPLA) को नेतृत्वमा रास्वपा निकट स्वतन्त्र कानुन व्यवसायी संगठन र नेकपा एकीकृत समाजवादी निकट कानुन व्यवसायीहरू समावेश गर्दै साझा प्यानल तयार पारेका छन्।
- अध्यक्ष पदका उम्मेदवार: रमनकुमार श्रेष्ठ (RPLA)
- महासचिव पदका उम्मेदवार: यज्ञमणि न्यौपाने (रास्वपा)
स्वतन्त्र उम्मेदवारहरू पनि प्रतिस्पर्धामा
गठबन्धनहरू बाहिर पनि केही उम्मेदवारहरू स्वतन्त्र रूपमा प्रतिस्पर्धामा उत्रिएका छन्।
- आशिष पौडेल, उज्वल घिमिरे, र राजु कैती अध्यक्ष पदका लागि स्वतन्त्र उम्मेदवारका रूपमा मैदानमा छन्।
नेपालको कानुनी क्षेत्रको प्रमुख संस्था नेपाल बार एसोसिएसनको नेतृत्वका लागि हुने यो निर्वाचनलाई राजनीतिक दलहरूसँग निकटताका आधारमा व्याख्या गरिने गरिएको छ। ३ वर्षे कार्यकालका लागि २५ सदस्यीय केन्द्रीय कार्यसमिति चयन गर्न यो मतदान हुँदैछ।
निर्वाचनको नतिजा केही दिनभित्र सार्वजनिक हुने अपेक्षा गरिएको छ।
