पनौती –
पनौतीस्थित विश्वकै एकमात्र कालाग्नि रुद्रपीठ लड्केश्वर धामले धार्मिक, सांस्कृतिक र राष्ट्रिय एकताको सन्देश लिएर नयाँ अध्याय सुरु गरेको छ । केही दिन अघि भव्य समारोहबीच ६.५ केजी शुद्ध चाँदीको विशेष निशानीको अनावरण संस्कृति पर्यटन मन्त्री बद्री पाण्डे र श्री १००८ स्वामी रमणानन्द महाराजको संयुक्त करकमलबाट सम्पन्न भयो ।
अनावरण समारोहमा प्रा. डा. भवानी खतिवडा, भारतका दर्शन नागनाथ, राष्ट्रिय पञ्चाङ्ग समितिका सदस्य ज्यो. लक्ष्मण पन्थी, समाजसेवी मधु आचार्य, पनौती नगरपालिका र वेथानचोक गाउँपालिकाका प्रमुख तथा जनप्रतिनिधि, पीठाचार्य, ज्योतिष परिषद्का पदाधिकारीहरू, कोटिहोमका गुरुहरू, दानदाता र ठूलो संख्यामा भक्तजन उपस्थित थिए ।
पीठाधीश मुकुन्द शर्मा हुमागाईले यो निशानीलाई ‘राष्ट्र र राष्ट्रियता प्रति श्रद्धा एवं संकल्प यात्रा’ अन्तर्गत ७७ वटै जिल्लामा लैजाने घोषणा गर्दै, लड्केश्वर दर्शन गर्न नसक्ने भक्तजनलाई पनि दर्शन गरेको सरहको अनुभव दिने बताए । यात्राको सुरक्षाका लागि गृह मन्त्रालयमार्फत सबै जिल्लाका प्रशासन कार्यालयलाई निर्देशन दिइसकेको र यात्राका लागि विशेष रथ निर्माण भइसकेको पनि उनले जानकारी दिए । यस यात्राले धार्मिक पर्यटनको विकाससँगै राष्ट्रिय एकतालाई सुदृढ बनाउने विश्वास व्यक्त गरिएको छ ।
