हेटौंडा । नेपाली कांग्रेसबाट निर्वाचित बागमती प्रदेशका १४ सदस्यहको शनिबार दिउँसो काठमाडौँमा बैठक बस्दैछ । आफ्नै सरकार र बहुमत हुँदाहुँदै कांग्रेसकै केही सदस्यहरुको स्वार्थका कारण मुख्यमन्त्रीबाट बहिर्गमन हुनु परेका बहादुर सिंह लामा पक्षधर १४ प्रदेश सभा सदस्यको बैठक बस्न लागेको हो ।
उनीहरुको माग पूरा नभए गाईजात्राका दिन लामा समूह बानियाँ पक्षलाई गाईजात्रा देखाइदिने तयारीमा छलफल भइरहेको बुझिएको छ । यीमध्ये रामकृष्ण चित्रकार मात्रै अमेरिकामा छन् । बाँकी सबै नियमित छलफल र सम्पर्कमा छन् ।
तर यो बीचमा लामाको सरकार ढाल्न सहयोग गर्ने मन्त्रीहरुलाई प्रमुख सचेतक, संसदको सचिवलगायतका पद बाँडेर बानियाँले सहमतिमा चासो नदिएपछि असन्तुष्टहरुले शनिबार बैठक बसेर टुंगोमा पुग्ने निर्णय गरेका छन् ।
उनीहरुको पुरानै एजेन्डा लामाले प्रदेश सभा सदस्य गोबिन्द लम्साल, माया श्रेष्ठ र गीता गुरुङलाई बागमती प्रदेश सरकारमा मन्त्री नियुक्त गरेको र उनीहरुको मन्त्रिमण्डलमा सहभागिता हुनु पर्ने माग छ ।
उनीहरु सहभागी नभए मुख्यमन्त्री बानियाँले सोमबार विश्वासको मत लिने दिन असहयोग गर्ने असन्तुष्ट पक्षको योजना छ । ‘दिउँसो हामी छलफल गर्नेछौँ र निष्कर्षमा पुग्नेछौँ,’ लामा सरकार अर्थमन्त्री एवम् प्रदेश सभा सदस्य कुन्दनराज काफ्लेले भने ।
असन्तुष्ट १४ जनाले नै मुख्यमन्त्री लामालाई प्रदेश सभा सदस्यबाटै राजीनामा बुझाइसकेको र यो राजीनामा बागमती प्रदेश सभाका सभामुख र पार्टी सभापति शेरबहादुर देउवालाई बुझाउनेसम्मको तयारी रहेको बताइएको छ । तीन जना मन्त्री बानियाँ सरकारमा सहभागी नै उनीहरुको पहिलो एजेन्डा हो ।
