काठमाडौं – रुपन्देही जिल्लाको मर्चवारी गाउँपालिका–३ का अध्यक्ष जनार्दन यादवसहित दुईजनाविरुद्ध तीन लाख रुपैयाँ घुस लिएको आरोपमा भ्रष्टाचारको मुद्दा दायर गरिएको छ।
अख्तियार दुरुपयोग अनुसन्धान आयोगका प्रवक्ता राजेन्द्रकुमार पौडेलका अनुसार आर्थिक वर्ष २०८१/८२ मा सिसु सेमरा दक्षिण धोबहिया छठघाट निर्माण, पूर्निकोट गाउँभित्र सडक पिसिसी ढलान, र सुरहवाँ गाउँभित्र सडक पिसिसी ढलानजस्ता विकास योजनाहरू सम्पन्न भइसकेपछि सिफारिस दिने क्रममा सेवाग्राहीसँग तीन लाख रुपैयाँ घुस मागिएको प्रमाणित भएको हो।
घुस रकम गणेश ट्रेडिङका सञ्चालकका छोरा विपिनकुमार पाण्डेयमार्फत लिइएको र पाण्डेयले मतियारका रूपमा भ्रष्टाचारजन्य कार्यमा सहयोग गरेको आयोगले जनाएको छ।
आयोगले भ्रष्टाचार निवारण ऐन, २०५९ को दफा २२ अनुसार बिगो रकम तीन लाख रुपैयाँ कायम गर्दै, प्रतिबन्धात्मक वाक्यांशअनुसार मुख्य कसुरदार सरहको सजाय माग गर्दै विशेष अदालत, काठमाडौंमा सोमबार आरोपपत्र दायर गरेको जानकारी दिएको छ।
