काभ्रे — अरनिको राजमार्गको वैकल्पिक मार्गका रूपमा प्रयोग हुँदै आएको बनेपा–नाला–ताथली सडक पुनः पूर्णरूपमा अवरुद्ध भएको छ। शुक्रबारको वर्षाले भासिएको पुलमा अस्थायी रूपमा राखिएको ह्युम पाइप लाइनमाथिको बेस भाग आइतवार साँझको बाढीले बगाएपछि सडक पूर्ण रूपमा ठप्प भएको हो।
जिल्ला ट्राफिक प्रहरी कार्यालय काभ्रेका प्रमुख प्रहरी निरीक्षक सुनिल धाजुका अनुसार आइतवार राति करिब ९ बजेबाट सडक अबरुद्ध भएको हो र सोमबार बिहानसम्म पनि आवागमन सुचारु हुन सकेको छैन।
“बाढीले ह्युम पाइपको आधार भाग बगाएपछि सडकमा जोखिमपूर्ण अवस्था उत्पन्न भएको छ। अहिले सम्बन्धित निकायहरूसँग समन्वय गरेर मर्मत तथा पुनःनिर्माणको काम सुरु गर्ने तयारी भइरहेको छ,” प्रमुख धाजुले जानकारी दिनुभयो।
उहाँले यात्रु तथा सवारी चालकहरूलाई तत्काल वैकल्पिक मार्ग प्रयोग गर्न आग्रह गर्दै अनावश्यक यात्राबाट जोगिन समेत अनुरोध गर्नुभएको छ।
यस सडक खण्ड काभ्रे जिल्लाको विभिन्न ग्रामीण क्षेत्र तथा भक्तपुर–ललितपुरसँग जोड्ने महत्वपूर्ण वैकल्पिक मार्गको रूपमा प्रयोग हुँदै आएको थियो। बारम्बारको बाढीपहिरो र अस्थायी संरचना कमजोर भएका कारण यस मार्गमा यात्रुहरू समस्यामा पर्न थालेका छन्।
स्थानीय प्रशासन तथा पूर्वाधार सम्बन्धी निकायले मौसम अनुकूल भएसँगै मर्मत कार्यलाई तीव्रता दिने तयारी गरेको जनाएको छ।
